Tambadāṭhikacoraghātakavatthu

Sahassamapi ce vācā, 
anatthapadasaṁhitā; 
Ekaṁ atthapadaṁ seyyo, 
yaṁ sutvā upasammati.

Bāhiyadārucīriyattheravatthu

Sahassamapi ce gāthā, 
anatthapadasaṁhitā; 
Ekaṁ gāthāpadaṁ seyyo, 
yaṁ sutvā upasammati.

Kuṇḍalakesitherīvatthu

Yo ca gāthā sataṁ bhāse, 
anatthapadasaṁhitā; 
Ekaṁ dhammapadaṁ seyyo, 
yaṁ sutvā upasammati.

Yo sahassaṁ sahassena, 
saṅgāme mānuse jine; 
Ekañca jeyyamattānaṁ, 
sa ve saṅgāmajuttamo.

Anatthapucchakabrāhmaṇavatthu

Attā have jitaṁ seyyo, 
yā cāyaṁ itarā pajā; 
Attadantassa posassa, 
niccaṁ saññatacārino.

Neva devo na gandhabbo, 
na māro saha brahmunā; 
Jitaṁ apajitaṁ kayirā, 
tathārūpassa jantuno.

Sāriputtattherassa mātulabrāhmaṇavatthu

Māse māse sahassena, 
yo yajetha sataṁ samaṁ; 
Ekañca bhāvitattānaṁ, 
muhuttamapi pūjaye; 
Sāyeva pūjanā seyyo, 
yañce vassasataṁ hutaṁ.

Sāriputtattherassa bhāgineyyavatthu

Yo ca vassasataṁ jantu, 
aggiṁ paricare vane; 
Ekañca bhāvitattānaṁ, 
muhuttamapi pūjaye; 
Sāyeva pūjanā seyyo, 
yañce vassasataṁ hutaṁ.

Sāriputtatherassa sahāyakabrāhmaṇavatthu

Yaṁ kiñci yiṭṭhaṁ va hutaṁ va loke, 
Saṁvaccharaṁ yajetha puññapekkho; 
Sabbampi taṁ na catubhāgameti, 
Abhivādanā ujjugatesu seyyo.

Āyuvaḍḍhanakumāravatthu

Abhivādanasīlissa, 
niccaṁ vuḍḍhāpacāyino; 
Cattāro dhammā vaḍḍhanti, 
āyu vaṇṇo sukhaṁ balaṁ.

Saṅkiccasāmaṇeravatthu

Yo ca vassasataṁ jīve, 
dussīlo asamāhito; 
Ekāhaṁ jīvitaṁ seyyo, 
sīlavantassa jhāyino.

Khāṇukoṇḍaññattheravatthu

Yo ca vassasataṁ jīve, 
duppañño asamāhito; 
Ekāhaṁ jīvitaṁ seyyo, 
paññavantassa jhāyino.

Sabbadāsattheravatthu

Yo ca vassasataṁ jīve, 
kusīto hīnavīriyo; 
Ekāhaṁ jīvitaṁ seyyo, 
vīriyamārabhato daḷhaṁ.

Paṭācārātherīvatthu

Yo ca vassasataṁ jīve, 
apassaṁ udayabbayaṁ; 
Ekāhaṁ jīvitaṁ seyyo, 
passato udayabbayaṁ.

Kisāgotamīvatthu

Yo ca vassasataṁ jīve, 
apassaṁ amataṁ padaṁ; 
Ekāhaṁ jīvitaṁ seyyo, 
passato amataṁ padaṁ.

Bahuputtikattherīvatthu

Yo ca vassasataṁ jīve, 
apassaṁ dhammamuttamaṁ; 
Ekāhaṁ jīvitaṁ seyyo, 
passato dhammamuttamaṁ.

Sahassavaggo aṭṭhamo.