Pañcasatabhikkhuvatthu 
 

Maggānaṭṭhaṅgiko seṭṭho, 
saccānaṁ caturo padā; 
Virāgo seṭṭho dhammānaṁ, 
dvipadānañca cakkhumā. 
 

Eseva maggo natthañño, 
Dassanassa visuddhiyā; 
Etañhi tumhe paṭipajjatha, 
Mārassetaṁ pamohanaṁ. 
 

Etañhi tumhe paṭipannā, 
dukkhassantaṁ karissatha; 
Akkhāto vo mayā maggo, 
aññāya sallakantanaṁ. 
 

Tumhehi kiccamātappaṁ, 
akkhātāro tathāgatā; 
Paṭipannā pamokkhanti, 
jhāyino mārabandhanā. 
 

Aniccalakkhaṇavatthu 
 

“Sabbe saṅkhārā aniccā”ti, 
yadā paññāya passati; 
Atha nibbindati dukkhe, 
esa maggo visuddhiyā. 
 

Dukkhalakkhaṇavatthu 
 

“Sabbe saṅkhārā dukkhā”ti, 
yadā paññāya passati; 
Atha nibbindati dukkhe, 
esa maggo visuddhiyā. 
 

Anattalakkhaṇavatthu 
 

“Sabbe dhammā anattā”ti, 
yadā paññāya passati; 
Atha nibbindati dukkhe, 
esa maggo visuddhiyā. 
 

Padhānakammikatissattheravatthu 
 

Uṭṭhānakālamhi anuṭṭhahāno, 
Yuvā balī ālasiyaṁ upeto; 
Saṁsannasaṅkappamano kusīto, 
Paññāya maggaṁ alaso na vindati. 
 

Sūkarapetavatthu 
 

Vācānurakkhī manasā susaṁvuto, 
Kāyena ca nākusalaṁ kayirā; 
Ete tayo kammapathe visodhaye, 
Ārādhaye maggamisippaveditaṁ. 
 

Poṭṭhilattheravatthu 
 

Yogā ve jāyatī bhūri, 
ayogā bhūrisaṅkhayo; 
Etaṁ dvedhāpathaṁ ñatvā, 
bhavāya vibhavāya ca; 
Tathāttānaṁ niveseyya, 
yathā bhūri pavaḍḍhati. 
 

Pañcamahallakabhikkhuvatthu 
 

Vanaṁ chindatha mā rukkhaṁ, 
vanato jāyate bhayaṁ; 
Chetvā vanañca vanathañca, 
nibbanā hotha bhikkhavo. 
 

Yāva hi vanatho na chijjati, 
Aṇumattopi narassa nārisu; 
Paṭibaddhamanova tāva so, 
Vaccho khīrapakova mātari. 
 

Suvaṇṇakārattheravatthu 
 

Ucchinda sinehamattano, 
Kumudaṁ sāradikaṁva pāṇinā; 
Santimaggameva brūhaya, 
Nibbānaṁ sugatena desitaṁ. 
 

Mahādhanavāṇijavatthu 
 

Idha vassaṁ vasissāmi, 
idha hemantagimhisu; 
Iti bālo vicinteti, 
antarāyaṁ na bujjhati. 
 

Kisāgotamīvatthu 
 

Taṁ puttapasusammattaṁ, 
byāsattamanasaṁ naraṁ; 
Suttaṁ gāmaṁ mahoghova, 
maccu ādāya gacchati. 
 

Paṭācārāvatthu 
 

Na santi puttā tāṇāya, 
na pitā nāpi bandhavā; 
Antakenādhipannassa, 
natthi ñātīsu tāṇatā. 
 

Etamatthavasaṁ ñatvā, 
paṇḍito sīlasaṁvuto; 
Nibbānagamanaṁ maggaṁ, 
khippameva visodhaye. 
 

Maggavaggo vīsatimo.