Vuttañhetaṁ bhagavatā vuttamarahatāti me sutaṁ:

“Cattārimāni, bhikkhave, appāni ceva sulabhāni ca, tāni ca anavajjāni. Katamāni cattāri? Paṁsukūlaṁ, bhikkhave, cīvarānaṁ appañca sulabhañca, tañca anavajjaṁ. Piṇḍiyālopo, bhikkhave, bhojanānaṁ appañca sulabhañca, tañca anavajjaṁ. Rukkhamūlaṁ, bhikkhave, senāsanānaṁ appañca sulabhañca, tañca anavajjaṁ. Pūtimuttaṁ, bhikkhave, bhesajjānaṁ appañca sulabhañca tañca anavajjaṁ. Imāni kho, bhikkhave, cattāri appāni ceva sulabhāni ca, tāni ca anavajjāni. Yato kho, bhikkhave, bhikkhu appena ca tuṭṭho hoti sulabhena ca anavajjena ca, idamassāhaṁ aññataraṁ sāmaññaṅganti vadāmī”ti.

Etamatthaṁ bhagavā avoca. Tatthetaṁ iti vuccati:

“Anavajjena tuṭṭhassa, 
appena sulabhena ca; 
Na senāsanamārabbha, 
cīvaraṁ pānabhojanaṁ; 
Vighāto hoti cittassa, 
disā nappaṭihaññati. 

Ye cassa dhammā akkhātā, 
sāmaññassānulomikā; 
Adhiggahitā tuṭṭhassa, 
appamattassa bhikkhuno”ti.

Ayampi attho vutto bhagavatā, iti me sutanti.

Dutiyaṁ.