Parivāra

Bhikkhuvibhaṅga

Dutiyabhāga

1.11 Vipattivāra

Methunaṁ dhammaṁ paṭisevanapaccayā āpattiyo catunnaṁ vipattīnaṁ kati vipattiyo bhajanti?

Methunaṁ dhammaṁ paṭisevanapaccayā āpattiyo catunnaṁ vipattīnaṁ dve vipattiyo bhajanti—

siyā sīlavipattiṁ siyā ācāravipattiṁ …pe….

Anādariyaṁ paṭicca udake uccāraṁ vā passāvaṁ vā kheḷaṁ vā karaṇapaccayā āpatti catunnaṁ vipattīnaṁ kati vipattiyo bhajati?

Anādariyaṁ paṭicca udake uccāraṁ vā passāvaṁ vā kheḷaṁ vā karaṇapaccayā āpatti catunnaṁ vipattīnaṁ ekaṁ vipattiṁ bhajati—

ācāravipattiṁ.

Vipattivāro niṭṭhito tatiyo.