Evaṁ me sutaṁ— ekaṁ samayaṁ bhagavā sākete viharati añjanavane migadāye.

Atha kho kakudho devaputto abhikkantāya rattiyā abhikkantavaṇṇo kevalakappaṁ añjanavanaṁ obhāsetvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhito kho kakudho devaputto bhagavantaṁ etadavoca: “nandasi, samaṇā”ti?

“Kiṁ laddhā, āvuso”ti?

“Tena hi, samaṇa, socasī”ti?

“Kiṁ jīyittha, āvuso”ti?

“Tena hi, samaṇa, neva nandasi na ca socasī”ti?

“Evamāvuso”ti.

“Kacci tvaṁ anagho bhikkhu,
kacci nandī na vijjati;
Kacci taṁ ekamāsīnaṁ,
aratī nābhikīratī”ti.
“Anagho ve ahaṁ yakkha,
atho nandī na vijjati;
Atho maṁ ekamāsīnaṁ,
aratī nābhikīratī”ti.
“Kathaṁ tvaṁ anagho bhikkhu,
kathaṁ nandī na vijjati;
Kathaṁ taṁ ekamāsīnaṁ,
aratī nābhikīratī”ti.
“Aghajātassa ve nandī,
nandījātassa ve aghaṁ;
Anandī anagho bhikkhu,
evaṁ jānāhi āvuso”ti.
“Cirassaṁ vata passāmi,
brāhmaṇaṁ parinibbutaṁ;
Anandiṁ anaghaṁ bhikkhuṁ,
tiṇṇaṁ loke visattikan”ti.

The Linked Discourses

|_The Group of Linked Discourses With Verses

|__【2】SN2. Linked Discourses on Gods

|___II. The Chapter with Anāthapiṇḍika

SN2.18 Kakudhasutta

Translations [3]

English

Việt Ngữ

पाळिभासा (Pāli)

Reference

Translations [3]

English

Việt Ngữ

पाळिभासा (Pāli)

Reference

Commentaries [0]