Evaṁ me sutaṁ— ekaṁ samayaṁ bhagavā rājagahe viharati veḷuvane kalandakanivāpe.

Atha kho sambahulā nānātitthiyasāvakā devaputtā asamo ca sahali ca nīko ca ākoṭako ca vegabbhari ca māṇavagāmiyo ca abhikkantāya rattiyā abhikkantavaṇṇā kevalakappaṁ veḷuvanaṁ obhāsetvā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ aṭṭhaṁsu.

Ekamantaṁ ṭhito kho asamo devaputto pūraṇaṁ kassapaṁ ārabbha bhagavato santike imaṁ gāthaṁ abhāsi:

“Idha chinditamārite,
Hatajānīsu kassapo;
Na pāpaṁ samanupassati,
Puññaṁ vā pana attano;
Sa ve vissāsamācikkhi, Satthā arahati mānanan”ti.

Atha kho sahali devaputto makkhaliṁ gosālaṁ ārabbha bhagavato santike imaṁ gāthaṁ abhāsi:

“Tapojigucchāya susaṁvutatto,
Vācaṁ pahāya kalahaṁ janena;
Samosavajjā virato saccavādī,
Na hi nūna tādisaṁ karoti pāpan”ti.

Atha kho nīko devaputto nigaṇṭhaṁ nāṭaputtaṁ ārabbha bhagavato santike imaṁ gāthaṁ abhāsi:

“Jegucchī nipako bhikkhu,
Cātuyāmasusaṁvuto;
Diṭṭhaṁ sutañca ācikkhaṁ,
Na hi nūna kibbisī siyā”ti.

Atha kho ākoṭako devaputto nānātitthiye ārabbha bhagavato santike imaṁ gāthaṁ abhāsi:

“Pakudhako kātiyāno nigaṇṭho,
Ye cāpime makkhalipūraṇāse;
Gaṇassa satthāro sāmaññappattā,
Na hi nūna te sappurisehi dūre”ti.

Atha kho vegabbhari devaputto ākoṭakaṁ devaputtaṁ gāthāya paccabhāsi:

“Sahācaritena chavo sigālo,
Na kotthuko sīhasamo kadāci;
Naggo musāvādī gaṇassa satthā,
Saṅkassarācāro na sataṁ sarikkho”ti.

Atha kho māro pāpimā begabbhariṁ devaputtaṁ anvāvisitvā bhagavato santike imaṁ gāthaṁ abhāsi:

“Tapojigucchāya āyuttā, pālayaṁ pavivekiyaṁ;
Rūpe ca ye niviṭṭhāse,
devalokābhinandino;
Te ve sammānusāsanti,
paralokāya mātiyā”ti.

Atha kho bhagavā “māro ayaṁ pāpimā” iti viditvā, māraṁ pāpimantaṁ gāthāya paccabhāsi:

“Ye keci rūpā idha vā huraṁ vā,
Ye cantalikkhasmiṁ pabhāsavaṇṇā;
Sabbeva te te namucippasatthā,
Āmisaṁva macchānaṁ vadhāya khittā”ti.

Atha kho māṇavagāmiyo devaputto bhagavantaṁ ārabbha bhagavato santike imā gāthāyo abhāsi:

“Vipulo rājagahīyānaṁ,
giri seṭṭho pavuccati;
Seto himavataṁ seṭṭho,
ādicco aghagāminaṁ.
Samuddo udadhinaṁ seṭṭho,
nakkhattānaṁva candimā;
Sadevakassa lokassa,
buddho aggo pavuccatī”ti.

NĀNĀTITTHIYAVAGGO TATIYO.

Tassuddānaṁ

Sivo khemo ca serī ca,
Ghaṭī jantu ca rohito;
Nando nandivisālo ca,
Susimo nānātitthiyena te dasāti.

DEVAPUTTASAṀYUTTAṀ SAMATTAṀ.

The Linked Discourses

|_The Group of Linked Discourses With Verses

|__【2】SN2. Linked Discourses on Gods

|___III. The Chapter on Various Sectarians

SN2.30 Nānātitthiyasāvakasutta

Translations [3]

English

Việt Ngữ

पाळिभासा (Pāli)

Reference

Translations [3]

English

Việt Ngữ

पाळिभासा (Pāli)

Reference

Commentaries [0]