Ekaṁ samayaṁ bhagavā māgadhesu viharati andhakavinde.

Tena kho pana samayena bhagavā rattandhakāratimisāyaṁ abbhokāse nisinno hoti, devo ca ekamekaṁ phusāyati.

Atha kho brahmā sahampati abhikkantāya rattiyā abhikkantavaṇṇo kevalakappaṁ andhakavindaṁ obhāsetvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhito kho brahmā sahampati bhagavato santike imā gāthāyo abhāsi:

“Sevetha pantāni senāsanāni,
Careyya saṁyojanavippamokkhā;
Sace ratiṁ nādhigaccheyya tattha,
Saṅghe vase rakkhitatto satīmā.
Kulākulaṁ piṇḍikāya caranto,
Indriyagutto nipako satimā;
Sevetha pantāni senāsanāni,
Bhayā pamutto abhaye vimutto.
Yattha bheravā sarīsapā,
Vijju sañcarati thanayati devo;
Andhakāratimisāya rattiyā,
Nisīdi tattha bhikkhu vigatalomahaṁso.
Idañhi jātu me diṭṭhaṁ,
nayidaṁ itihītihaṁ;
Ekasmiṁ brahmacariyasmiṁ,
sahassaṁ maccuhāyinaṁ.
Bhiyyo pañcasatā sekkhā,
dasā ca dasadhā dasa;
Sabbe sotasamāpannā,
atiracchānagāmino.
Athāyaṁ itarā pajā,
puññabhāgāti me mano;
Saṅkhātuṁ nopi sakkomi,
musāvādassa ottapan”ti.

The Linked Discourses

|_The Group of Linked Discourses With Verses

|__【6】SN6. Linked Discourses With Brahmā Gods

|___II. Chapter Two

SN6.13 Andhakavindasutta

Translations [3]

English

Việt Ngữ

पाळिभासा (Pāli)

Reference

Translations [3]

English

Việt Ngữ

पाळिभासा (Pāli)

Reference

Commentaries [0]