“Aṅgārino dāni dumā bhadante,
Phalesino chadanaṁ vippahāya;
Te accimantova pabhāsayanti,
Samayo mahāvīra bhāgī rasānaṁ.
Dumāni phullāni manoramāni,
Samantato sabbadisā pavanti;
Pattaṁ pahāya phalamāsasānā,
Kālo ito pakkamanāya vīra.
Nevātisītaṁ na panātiuṇhaṁ,
Sukhā utu addhaniyā bhadante;
Passantu taṁ sākiyā koḷiyā ca,
Pacchāmukhaṁ rohiniyaṁ tarantaṁ.
Āsāya kasate khettaṁ,
bījaṁ āsāya vappati;
Āsāya vāṇijā yanti,
samuddaṁ dhanahārakā;
Yāya āsāya tiṭṭhāmi,
sā me āsā samijjhatu.
Punappunaṁ ceva vapanti bījaṁ,
Punappunaṁ vassati devarājā;
Punappunaṁ khettaṁ kasanti kassakā,
Punappunaṁ dhaññamupeti raṭṭhaṁ.
Punappunaṁ yācanakā caranti,
Punappunaṁ dānapatī dadanti;
Punappunaṁ dānapatī daditvā,
Punappunaṁ saggamupenti ṭhānaṁ.
Vīro have sattayugaṁ puneti,
Yasmiṁ kule jāyati bhūripañño;
Maññāmahaṁ sakkati devadevo,
Tayā hi jāto muni saccanāmo.
Suddhodano nāma pitā mahesino,
Buddhassa mātā pana māyanāmā;
Yā bodhisattaṁ parihariya kucchinā,
Kāyassa bhedā tidivamhi modati.
Sā gotamī kālakatā ito cutā,
Dibbehi kāmehi samaṅgibhūtā;
Sā modati kāmaguṇehi pañcahi,
Parivāritā devagaṇehi tehi”.
“Buddhassa puttomhi asayhasāhino,
Aṅgīrasassappaṭimassa tādino;
Pitupitā mayhaṁ tuvaṁsi sakka,
Dhammena me gotama ayyakosī”ti.

… Kāḷudāyī thero ….

The Minor Discourses

|_【8】 Verses of the Senior Monks

|__J. The Book Of The Tens

|___I. Chapter One

Thag10.1 Kāḷudāyittheragāthā

Translations [3]

English

पाळिभासा (Pāli)

Reference

Translations [3]

English

पाळिभासा (Pāli)

Reference

Commentaries [0]