“Mā su te vaḍḍha lokamhi,
vanatho āhu kudācanaṁ;
Mā puttaka punappunaṁ,
ahu dukkhassa bhāgimā.
Sukhañhi vaḍḍha munayo,
anejā chinnasaṁsayā;
Sītibhūtā damappattā,
viharanti anāsavā.
Tehānuciṇṇaṁ isībhi,
maggaṁ dassanapattiyā;
Dukkhassantakiriyāya,
tvaṁ vaḍḍha anubrūhaya”.
“Visāradāva bhaṇasi,
etamatthaṁ janetti me;
Maññāmi nūna māmike,
vanatho te na vijjati”.
“Ye keci vaḍḍha saṅkhārā,
hīnā ukkaṭṭhamajjhimā;
Aṇūpi aṇumattopi,
vanatho me na vijjati.
Sabbe me āsavā khīṇā,
appamattassa jhāyato;
Tisso vijjā anuppattā,
kataṁ buddhassa sāsanaṁ”.
“Uḷāraṁ vata me mātā,
patodaṁ samavassari;
Paramatthasañhitā gāthā,
yathāpi anukampikā.
Tassāhaṁ vacanaṁ sutvā,
anusiṭṭhiṁ janettiyā;
Dhammasaṁvegamāpādiṁ,
yogakkhemassa pattiyā.
Sohaṁ padhānapahitatto,
rattindivamatandito;
Mātarā codito santo,
aphusiṁ santimuttamaṁ”.

… Vaḍḍhamātā therī ….

Navakanipāto niṭṭhito.

The Minor Discourses

|_【9】 Verses Of The Senior Nuns

|__I. The Book Of The Nines

Thig9.1 Vaḍḍhamātutherīgāthā

Translations [3]

English

Việt Ngữ

पाळिभासा (Pāli)

Reference

Translations [3]

English

Việt Ngữ

पाळिभासा (Pāli)

Reference

Commentaries [0]