Theravāda Vinaya

Mahāvibhaṅga

Pācittiyakaṇḍa

Sahadhammikavagga

81. Dubbalasikkhāpada

Tena samayena buddho bhagavā rājagahe viharati veḷuvane kalandakanivāpe.

Tena kho pana samayena āyasmā dabbo mallaputto saṅghassa senāsanañca paññapeti bhattāni ca uddisati.

So cāyasmā dubbalacīvaro hoti.

Tena kho pana samayena saṅghassa ekaṁ cīvaraṁ uppannaṁ hoti.

Atha kho saṅgho taṁ cīvaraṁ āyasmato dabbassa mallaputtassa adāsi.

Chabbaggiyā bhikkhū ujjhāyanti khiyyanti vipācenti—

“yathāsanthutaṁ bhikkhū saṅghikaṁ lābhaṁ pariṇāmentī”ti.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma chabbaggiyā bhikkhū samaggena saṅghena cīvaraṁ datvā pacchā khīyanadhammaṁ āpajjissantī”ti …pe…

“saccaṁ kira tumhe, bhikkhave, samaggena saṅghena cīvaraṁ datvā pacchā khīyanadhammaṁ āpajjathā”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma tumhe, moghapurisā, samaggena saṅghena cīvaraṁ datvā pacchā khīyanadhammaṁ āpajjissatha.

Netaṁ, moghapurisā, appasannānaṁ, vā pasādāya …pe…

evañca pana, bhikkhave, imaṁ sikkhāpadaṁ uddiseyyātha—

“Yo pana bhikkhu samaggena saṅghena cīvaraṁ datvā pacchā khīyanadhammaṁ āpajjeyya ‘yathāsanthutaṁ bhikkhū saṅghikaṁ lābhaṁ pariṇāmentī’ti, pācittiyan”ti.

Yo panāti

yo yādiso …pe…

bhikkhūti

…pe… ayaṁ imasmiṁ atthe adhippeto bhikkhūti.

Samaggo nāma saṅgho

samānasaṁvāsako samānasīmāyaṁ ṭhito.

Cīvaraṁ nāma

channaṁ cīvarānaṁ aññataraṁ cīvaraṁ vikappanupagaṁ pacchimaṁ.

Datvāti

sayaṁ datvā.

Yathāsanthutaṁ nāma

yathāmittatā yathāsandiṭṭhatā yathāsambhattatā yathāsamānupajjhāyakatā yathāsamānācariyakatā.

Saṅghikaṁ nāma

saṅghassa dinnaṁ hoti pariccattaṁ.

Lābho nāma

cīvarapiṇḍapātasenāsanagilānappaccayabhesajjaparikkhārā, antamaso cuṇṇapiṇḍopi, dantakaṭṭhampi, dasikasuttampi.

Pacchā khīyanadhammaṁ āpajjeyyāti

upasampannassa saṅghena sammatassa senāsanapaññāpakassa vā bhattuddesakassa vā yāgubhājakassa vā phalabhājakassa vā khajjabhājakassa vā appamattakavissajjakassa vā cīvaraṁ dinne khiyyati, āpatti pācittiyassa.

Dhammakamme dhammakammasaññī cīvaraṁ dinne khiyyati, āpatti pācittiyassa.

Dhammakamme vematiko cīvaraṁ dinne khiyyati, āpatti pācittiyassa.

Dhammakamme adhammakammasaññī cīvaraṁ dinne khiyyati, āpatti pācittiyassa.

Aññaṁ parikkhāraṁ dinne khiyyati, āpatti dukkaṭassa.

Upasampannassa saṅghena asammatassa senāsanapaññāpakassa vā bhattuddesakassa vā yāgubhājakassa vā phalabhājakassa vā khajjabhājakassa vā appamattakavissajjakassa vā cīvaraṁ vā aññaṁ vā parikkhāraṁ dinne khiyyati, āpatti dukkaṭassa.

Anupasampannassa saṅghena sammatassa vā asammatassa vā senāsanapaññāpakassa vā bhattuddesakassa vā yāgubhājakassa vā phalabhājakassa vā khajjabhājakassa vā appamattakavissajjakassa vā cīvaraṁ vā aññaṁ vā parikkhāraṁ dinne khiyyati, āpatti dukkaṭassa.

Adhammakamme dhammakammasaññī, āpatti dukkaṭassa.

Adhammakamme vematiko, āpatti dukkaṭassa.

Adhammakamme adhammakammasaññī, anāpatti.

Anāpatti—

pakatiyā chandā dosā mohā bhayā karontaṁ “kvattho tassa dinnena laddhāpi vinipātessati na sammā upanessatī”ti khiyyati,

ummattakassa,

ādikammikassāti.

Dubbalasikkhāpadaṁ niṭṭhitaṁ ekādasamaṁ.